Շեքսպիրյան էջ

Համաշխարհային թատերգության դասական Վիլյամ Շեքսպիրի և Դրամատիկական թատրոնի ստեղծագործական “համագործակցությունը” ձևավորվել է թատրոնի հիմնադրումից մի քանի տարի անց և շարունակվել մինչև օրս

Դրամատիկականը միակ հայկական թատրոնն է, որը հետևողականորեն ընթացել է շեքսպիրյան ստեղծագործությունների ինքնատիպ և նորովի մեկնաբանությունների ճանապարհով՝ ամեն անգամ ձգտելով բացահայտել տակավին չհետազոտված և չմեկնաբանված շերտեր: Թատրոնը հատկապես իր խաղացանկ է բերել այն ստեղծագործությունները, որոնք հայ բեմում կամ քիչ բեմական ավանդույթներ են ունեցել, կամ բեմադրվել են առաջին անգամ: Սա վկայությունն է այն  բանի, որ նպատակը եղել է նոր բեմադրական ավանդույթների հաստատումը, արդի թատերաարտահայտչական համակարգերի կիրառմամբ շեքսպիրյան ստեղծագործությունների բազմակողմանի մատուցումը:

1973 թվականին Հրաչյա Ղափլանյանը բեմադրեց “Ռիչարդ Երրորդ” ողբերգությունը, որն առաջին անգամ էր ներկայացվում հայ թատրոնում: Գլխավոր դերում հանդես էր գալիս Լևոն Թուխիկյանը: Բեմադրությունն աչքի ընկավ ռեժիսորական լուծումների բազմազանությամբ և, որ կարևորն է, այստեղ արդեն հիմք դրվեց “օտարացման” տեսությունը, որը հետագայում շարունակվեց Հրաչյա Ղափլանյանի այլ շեքսպիրյան բեմադրություններում: Հենց նույն տարում թատրոնի մոսկովյան հյուրախաղերի ժամանակ այս բեմադրությունն արժանացավ ռուս թատերագիտության և թատերական քննադատների բարձր գնահատականներին: Հր. Ղափլանյանը “Ռիչարդ Երրորդ” բեմադրեց նաև Մոսկվայի Եվգ. Վախթանգովի անվան ակադեմիական թատրոնում, ինչն էլ առիթ տվեց, որպեսզի տեղի ունենար հայ և ռուս թատրոնների ուշագրավ մերձեցում, ԽՍՀՄ ժողովրդական արտիստ Միխաիլ Ուլյանովը հանդես եկավ Ռիչարդի դերով դրամատիկականցիների հետ:

1978 թվականին Արմեն Խանդիկյանն իրականացրեց “Համլետ” ողբերգության բեմադրույթունը

Սա հայ թատրոնում երբևէ ստեղծված ամենահամարձակ և խիզախ բեմադրությունն էր, որում վերանայվում էին նշանավոր ողբերգության մեկնաբանությունների շատ ավանդույթներ, առաջ էր մղվում Ժամանակի կերպարը, որն արտացոլված էր “Դանիան բանտ է” արտահայտության մեջ: Համլետի դերում հանդես եկավ ՀԽՍՀ ժողովրդական արտիստ Վլադիմիր Մսրյանը: Թատրոնի 1981 թ. մոսկովյան հյուրախաղերի ժամանակ բարձր գնահատվեց Ա. Խանդիկյանի բեմադրությունը, մասնավորաբար անվանի շեքսպիրագետ Ա. Օբրազցովան բեմադրությունը համարեց ամենաինքնատիպներից մեկը սովետական բեմական շեքսպիրապատումում: 1981-ին Երևանում տեղի ունեցած շեքսպիրյան բեմադրությունների համամիութենական փառատոնի առթիվ իր զեկուցման մեջ համաշխարհային շեքսպիրագիտական կենտրոնի ղեկավար Ալեքսեյ Բարտոշևիչը իր բարձր գնահատականը տվեց Ա. Խանդիկյանի բեմադրությանը: Նույն`1981թ. Հրաչյա Ղափլանյանը, առաջինը սովետական թատրոնում, բեմադրեց<Սպիտակ և կարմիր վարդերի պատերազմը> ըստ <Հենրի Վեցերորդ> քրոնիկոնի: Այս բեմադրությունն արժանացավ շեքսպիրագետների բարձր գնահատականներին: 1992 թ. Արմեն Խանդիկյանն առաջին անգամ հայ թատրոն բերեց “Հուլիոս Կեսար” ողբերգության բեմադրությունը, որտեղ Հուլիոսի դերում հանդես եկավ Վլադիմիր Մսրյանը:

Այս ստեղծագործությանը թատրոնն  անդրադարձավ 2011 թվականին: Բեմադրությունն արժանացավ ՀՀ Պետական մրցանակի: Առաջին անգամ էր հայ թատրոնում բեմադրված շեքսպիրյան ստեղծագործությունը գնահատվում պետական մրցանակով: Այս ներկայացումով թատրոնը 2014 թվականին մասնակցեց Ռումինիայում տեղի ունեցող շեքսպիրյան փառատոնին: 1996 թվականին թատրոնի խաղացանկ եկավ “Ռոմեո և Ջուլիետ” ողբերգությունը` Արմեն Խանդիկյանի բեմադրությամբ: Արմեն Խանդիկյանի բեմադրությամբ 2004 թ. ներկայացվեց “Մակբեթ” ողբերգությունը, որով թատրոնը մասնակցեց Լեհաստանում և Հունգարիայում կայացած շեքսպիրյան բեմադրությունների փառատոններին: Մակբեթի դերով հանդես եկավ ՀՀ Ժողովրդական արտիստ Արթուր Ութմազյանը: Թատրոնը երկրորդ անգամ անդրադարձավ “Համլետին”` Արթուր Սահակյանի բեմադրությամբ, Համլետի դերում` ՀՀ Վաստակավոր արտիստ Հրաչյա Հարությունյան: 2014 թ.ին բեմադրիչ Գրիգոր Խաչատրյանը ներկայացրեց <12-րդ գիշեր> կատակերգությունը, որն արժանացավ ՀԹԳՄ Արտավազդ մրցանակի:

Recent Posts

    Recent Comments

    About Me

    Theresa Jordan

    Curabitur nec justo sit amet urna convallis viverra. Phasellus auctor id lectus vel tincidunt. Phasellus sed lorem id diam venenatis ullamcorper. Curabitur iaculis risus vitae magna eleifend, at auctor dolor ultricies. Sed rhoncus aliquam turpis, a hendrerit arcu.

    Latest Posts
    Sponsored

    Recent Comments
    Movie, TV Show, Filmmakers and Film Studio WordPress Theme.

    Press Enter / Return to begin your search or hit ESC to close

    By signing in, you agree to our terms and conditions and our privacy policy.

    New membership are not allowed.